Egoera kezkagarrian dago Kronika, eta kolokan dago bere biziraupena. Oso hitz gordinak dira, baina limitean dago lantaldea, eutsi ezinik. Momentu honetan, hiru langile geratu dira bulegoan, baja eta lanuzte gehiago pilatu direlako.
Horren aurrean, ezohiko eta presazko batzarra deitu du Dobera Euskara Elkarteak, datorren astelehenerako: martxoaren 2an, arratsaldeko 19:00etan Biterin.
Mutur-muturreko egoera da, eta horregatik egin dugu deialdia astebete exkaxeko epean. Bazkideen laguntza behar du Kronikak, inoiz baino gehiago. Horregatik, batzarrera bertaratzeko deia luzatu nahi diegu guztiei.
Publizitate zerbitzurik ez momentuz, eta eskelak bezperako 15:00ak arte
Aipatutako egoeran, behin-behineko bi erabaki hartu behar izan ditugu, ezohiko batzarrera bitartean. Batetik, ez da publizitate zerbitzurik eskainiko momentuz. Eta bestetik, hurrengo eguneko Kronikan argitaratzeko eskelak 15:00ak arte hartuko dira, astelehenetik ostiralera.