Prozesu administratiboan aurrera jarraitzen du Hernaniko lurretan proiektatutako 'Ikatz Gane' parke eolikoak, Enigma Green Powerrek sustatuta. Izan ere, gaur jendaurrean ikusgai jarri du proiektua Eusko Jaurlaritzak, aurretiazko administrazio- baimena eman ahal izateko.
Industria, Trantsizio Energetiko eta Jasangarritasun Sailaren Gipuzkoako Lurralde Ordezkaritzak eman behar dio administrazio-baimen hori proiektuari, eta horretarako, ezinbesteko tramitea da jendaurrean ikusgai jartzea proiektua bera eta ingurumen inpaktuaren azterketa.
Euskal Herriko Agintaritzaren Aldizkarian argitaratu dute iragarkia gaurkoan, eta horren arabera, 40,7 milioi euro pasatxoko proiektua da Enigma Green Powerrek (Endesarekin lotutako enpresak) Hernaniko lurretarako aurkeztu duena, Aranorekin mugan, Garagartzako mendilerroan. 4,99 megabatioko bost aerosorgailu lirateke, denera 24,95 megabatioko potentziarekin. 112 metroko altuera izango lukete aerosorgailuek, eta errotoreek 175 metroko diametroa. 30 kiloboltioko sekzionamendu-zentro bat ere aurreikusita dago, hori ere Hernaniko lurretan; eta 7,425 kilometroko aireko eta lurpeko linea elektriko bat, sekzionamendu-zentrotik azpiestazio elektrikora.
Herritarrek 30 eguneko epea daukate alegazioak aurkezteko, bihartik hasita, EAEko Administrazio Publikoaren erregistro elektroniko orokorraren bitartez (euskadi.eus/erregistro-elektroniko-orokorra).