2026rako doako bi formakuntza lerro berri prestatu ditu Beterri-Buruntza Mankomunitateak. Batetik, Sukaldeko Oinarrizko Eragiketak ibilbidea, Erroak-Sartu erakundearen eskutik. Eta Tamaina Handiko Arotzeria eta Kudeaketa ibilbideak bestetik, Emaus Gizarte Fundazioa eta Arotzgi erakundeen eskutik.
Sukaldeko Oinarrizko Eragiketen formakuntzarekin batera, «ostalaritza sektorearen beharrei erantzun» nahi diete, eskualdean langabezia-egoeran dauden pertsonen laneratzea sustatu asmoz. Alde teorikoa eta praktikoa eskainiko da, eta partehartzeileek gaitasun digitalak, hizkuntza-gaitasunak eta zeharkako konpetentziak landuko dituzte; besteak beste, komunikazio eraginkorra, talde-lana eta moldagarritasuna. Orotara, 15 pertsonez osatuko da taldea, eta behin formakuntza amaituta, ziurtagiri profesionala eskuratzeko aukera izango da.
Otsailean, berriz, Arotzeria eta Kudeaketa ibilbidea jarriko dute martxan. Formakuntza honek zurgintzan kualifikazio teknikoa eskaintzeko helburua du, «sektorean dagoen langile kualifikatuen eskariari erantzuteko». 305 orduko formakuntza teknikoa izango dute ikasleek, eta batik bat, tamaina haundiko zurezko hondakinen berreskurapena eta errebalorizazioa, arotzeriako zerbitzuetako oinarrizko prozedurak, eta zurezko hondakinen sailkapena eta lehengoratzea landuko direla aurreratu dute. 50 orduko prestakuntza jasoko dute gaitasun soziolaboral eta digitalen inguruan. Gainera, 90 orduko praktikak egiteko aukera izango dute ikasleek, sektoreko enpresetan. Alde teorikoa Hernaniko Iturola eraikinean egingo da, eta praktikoa, Urnietako Emaus Fundazioan.
Izena eman nahi duenak edo informazio gehiago eskuratu nahi duenak beterriburuntza.eus webgunea bisitatu dezake. Bestalde, enplegua@beterriburuntza.eus helbidera ere idatzi dezake, edo 747 441 752 telefonora deitu.