Martxoaren 24ko ordu txikienetan pasako da Korrika Hernanitik eta Astigarragatik

Korrikari babesa eta bultzada ez ezik, argitasuna ere emateko ardura izango dute hernaniarrek eta astigartarrek, aurtengoan. Izan ere, goizaldeko ordu txikienetan iritsiko da 24. Korrika Urumea bailarara, martxoaren 24an, asteartetik asteazkenerako gauean. Urnietatik datorrela, 01:20etan iritsiko da Hernanira, eta ia hiru ordu laurdeneko tartean zeharkatuko ditu herriko txoko guztiak, Astigarragarako bidea hartu aurretik. 02:02etan hartuko dute lekukoa astigartarrek Martindegin, eta 02:38an Perurenan entregatu.

Goizuetara, Aranora eta Ere­ñotzura, ordea, ez du bisitarik egingo aurtengo Korrikak, duela bi urte Urumea ibaiari segika bailara osoa zeharkatu ondoren.

Hernanira iritsi baino bost egun lehenago hasiko da Korrika Atharratzen: martxoaren 19an, arratsaldeko 15:30etan. 11 egu­nez Euskal Herri osoan barrena ibili ondoren, Bilbon bukatuko da, martxoaren 29an.

3.436 lekuko eta 460 herri inguru, 24. Korrikak

Ohiturari jarraiki, eta aurreko Korrika Baionan bukatu zenez, Ipar Euskal Herrian hasiko da aurtengoa; zehazki, Zuberoan. Be­rezia izango da abiatzea, Korrikaren «itzalguneetako bat» baita Zuberoako Basabürüa eskualdea, AEK euskaltegiak aitortu duenez: 1985ean bakarrik pasa da bertatik, eta hain juxtu, orduan ere Atharratzetik abiatu zen. Gainera, nabarmendu dute «inoiz baino agerikoagoa» dela euskera sustatzeko eta kalera ateratzeko beharra, etxeko transmisioa eten egin delako, eskola transmisioa ez delako %15era iristen, eta euskeraren erabilera desagertzen ari delako kalean.

Bizkaian azkeneko pausoak eman aurretik, euskal lurralde guztiak zeharkatuko ditu Korrikak. 460 herri inguru bisitatuko ditu aurtengoan, eta 3.436 lekuko-hartze izango dira guztira, 2.175 kilometroko ibilbide luzean. Zentzu horretan, aurtengo Korrika «inoiz baino partehartzaileagoa» izango dela aurreikusi du AEK euskaltegiak.

Martxoko azkeneko igandean iritsiko da Korrika Bilbora, goizeko 07:20ak aldera; eta ia bost orduz hiriburuko kaleetan barrena ibili ondoren, eguerdi partean egingo dute ekitaldia, lekukoaren barruko mezu sekretua irakurri eta egun osoko jaiari hasiera emateko.

Aurten ere izango da Korrika zuzenean jarraitzeko aukera. Batetik, furgonetaren geolokalizazio bidez jakingo dute korrikalariek uneoro non dagoen; eta bestetik, furgonetatik bertatik zuzeneko irudiak eskainiko dituzte 24 orduz. Horiek eskuragarri izango dira Korrikaren aplikazioaren bitartez, eta azaldu dutenez, berritu egin dute aurten, informazio, albiste eta bestelako edukiekin.