Hernanin, inguruko beste herri batzuen bidea jarraituz, Astigarraga eta Oiartzun esaterako, lehenengo sektoreko ustiategietan ordezkapen zerbitzua martxan jarri da udazken honetan. Zerbitzu honek aukera eskaintzen du, Hernaniko baserritarrak gaixotasun edo istripu baten ondorioz lanerako ezinduta aurkitzen direnean, oporrak hartzeko edo karga haundiko garaietan ordezko edo langile laguntzaile bat edukitzeko. «Horrela, bermatzen da baserriko jardunak ez duela etenaldirik izango», nabarmendu dute.
Irailetik azarora, Hernaniko lau ustiategik erabili dute zerbitzua. 30 egun izan dira, guztira, ordezkapenekin bete direnak, epe horretan.
Udalak lagunduta, Behemendiren bidez eman da zerbitzua. 2.400 euroko ekarpena egin du Udaleko Lehen sektoreko sailak. Horrez gain, baserritarrek ere zati bat ordaindu dute.
Zazpi baserriri emango zaio zerbitzua, 65 egun ordezkatuz
Datorren urteari begira, eta «zerbitzua lehenengo sektoreko profesionalei laguntzeko egokia eta interesgarria» dela baloratuta, Hernaniko ustiategiei eskainiko zaien ordezkapen-zerbitzua zabalagoa izango da: zazpi ustiategiri emango zaio zerbitzua, eta 65 egun ordezkatuko dira.
Udalak 5.300 euro bideratuko ditu. Interesatuta dauden ekoizleak, Behemendirekin edo Hernaniko Udaleko lehenengo sektoreko sailarekin jarri daitezke harremanetan ondorengo bideetatik: Burujabetzen Etxea (Florida, 28) edo 943 256 347 telefono zenbakia.