Urteko lasterketa garrantzitsuena izaten da Behobia-Donostia inguruko korrikalari askorentzat. 28.000 korrikalarik osatu zuten igandean 20 kilometroko ibilbidea, eta horietatik ia 300 izan ziren Urumea bailarakoak. Bakoitza helburu desberdinarekin, baina denak festa giroaz gozatzeko pronto ibili ziren, irripartsu helmugaratuta.
Xanti Uranga hernaniarra izan zen bailarako azkarrena, lasterketa 1:10:40 denboran osatuta. Goizuetarren artean, berriz, Aitor Aizkorbek lortu zuen denborarik onena (1:11:42); eta astigartarren artean Aitor Grande izan zen azkarrena (1:16:07).
Emakumezkoen artean, Maitane Guerrero hernaniarra izan zen lehenengoa Boulevardeko helmugan, 1:24:45 denborarekin. Astigarragako lehenengo emakumezkoa, berriz, Marta Urbistondo izan zen, 1:28:50 markarekin.
