Azken asteetan ohi baino korrikalari gehiago ikusi dituzue kalean, ezta? Noski, bihar goizean jokatuko baita Behobia-Donostia lasterketa ezagunaren 60. edizioa! Zapatillak jantzi eta 20 kilometro pasatxo egin beharko dituzte parte hartzaileek, Boulevardeko helmugara iritsi arte.
27.981 korrikalarik hartuko dute parte lasterketan. Aurtengo datu esanguratsuena emakumezkoen kopurua da, nabarmen egin baitu gora aurreko edizioekin alderatuta: 9474 emakumezko arituko dira korrika, sekula baino gehiago; eta parte hartzaile guztien %33,86 izango dira.
Bailarako presentzia ere nabarmena izango da aurtengo edizioan. Hernaniko 159 herritar apuntatu dira (47 emakumezko eta 112 gizonezko) eta Astigarragako 131 (31 emakumezko eta 100 gizonezko).
Ibilbidean zehar sortzen den giro bereziagatik da ezaguna Behobia-Donostia lasterketa. 60.000 pertsona elkartu ohi dira bide bazterretan, ingurukoei eta parte hartzaileei babesa adierazteko. Antolakuntzatik garraio publikoa erabiltzeko gomendioa zabaldu dute.
Dortsalak eskuragarri, gaur
Dortsalak Kursaalen jaso behar dituzte korrikalariek. Gaur ia egun osoan zehar izango dute bertatik pasatzeko aukera: 10:00etatik 20:00etara.