Buruz Buruko Txapelketatik errekuperatzeko aste batzuk izan dituzte erremontariek, eta gaur arratsaldean ekingo diote Binakako Txapelketari. 55. edizioa izango da aurtengoa, eta lau bikote arituko dira nor baino nor Maila Nagusian.
Hasiera batean, ez dago faborito argirik. Iazko txapelketarekin alderatuta, Urrizak eta Barrenetxeak ez dute parte hartuko, eta Ezkurra II-Azpiroz iazko txapeldunek ez dute elkarrekin jokatuko.
Arratsaldeko 16:30etan hasiko da gaurko jaialdia, eta bederatzi jardunalditan jokatuko dute lehenengo fasea. Hasieran bikote guztiek elkarren kontra jokatu beharko dute bi itzulitara. Gaurko lehenengo partidua Jabalera-Juanenea eta Ansa II-Zubiri bikoteen artekoa izango da, eta ondoren Ezkurra II-Larrañaga eta Aldabe-Azpiroz bikoteek jokatuko dute.
Partidu guztiak 15 tantuko 2 setetara jokatuko dituzte, eta, beharrezkoa den kasuetan, 8 tantura jokatuko dute desenpatea. Puntuaketa sistema azken boladan bezalakoa izango da: partidua 2-0 irabazten duen bikoteak 4 puntu lortuko ditu, 2-1 irabazten duenak 3 puntu, 1-2 galtzen duenak puntu 1, 0-2 galtzen duenak 0 puntu eta 15 tanto baino gutxiago egiten dituen bikoteak -1 puntu.
Ligaxka amaitzen denean lehenengo postuan dagoen bikoteak zuzenean lortuko du finalerako txartela, eta bigarren eta hirugarren sailkatuek finalerdiko partidua jokatu beharko dute abenduaren 27an. Irabazten duena pasako da urtarrilaren 3ko final haundira.
Bigarren Mailako Txapelketak ere egutegi bera izango du aurtengoan. Gaur jokatuko dute lehenengo partidua: Goikoetxea V-Goikoetxea VII/Aiestaran VI-Aiestaran VI.
Bonoak salgai, deskontu haundiarekin
Dagoeneko salgai daude Binakako Txapelketako partiduetara joateko bono berriak. Horiek erosten dituzten erremontezaleek %40-ko deskontua izango dute. Informazio guztia eskuragarri dago www.oriamendi.eus webgunean.
BINAKAKO TXAPELKETETAKO BIKOTEAK
MAILA NAGUSIKO BIKOTEAK
Imanol ANSA II
Aritz ZUBIRI
Josetxo EZKURRA II
Iban LARRAÑAGA
Beñat SEGUROLA
Aritz JUANENEA
Kemen ALDABE
Xabier AZPIROZ
2. MAILAKO BIKOTEAK
Julen DESKARGA
Ibai MARTIRENA
Paulo AIESTARAN VII
Aitor AIESTARAN VI
Urtzi GURRUTXAGA
Aritz ESKUDERO
Ander GOIKOETXEA V
Joseba GOIKOETXEA VI
Barrenetxearen baja, Aiestaran anaien bikotea eta Deskargaren debuta
Endika Barrenetxearen aitatasun baja dela eta, Zubiri izango da Maila Nagusian arituko den bailarako erremontari bakarra. Bigarren mailan hiru hernaniarrek jokatuko dute.
Urumea bailarako ordezkaritza ohi baino txikiagoa izango da aurtengo Binakako Erremonte Txapelketetan. Maila nagusian hutsune haundi xamar bat sumatu daiteke, Endika Barrenetxea hernaniarrak ez baitu parte hartuko. Atzelaria aitatasun bajagatik geratu da txapelketatik kanpo.
Hortaz, Aritz Zubiri goizuetarra izango da ordezkari bakarra lehenengo mailan. Imanol Ansa izango da Zubiriren aurrelaria, eta urnietarraren maila ezagututa, ez dira erremontezaleen kinieletatik oso aparte ibiliko. Gaur ekingo diote txapelketari.
Aiestaran anaien batera jokatuko dute binakakoa
Paulo eta Aitor Aiestaran anaiek ezin hobeto ezagutzen dute euren aurtengo bikotea, elkarrekin jokatuko baitute binakakoa. Aurretik lehiatu izan dute batera, Berria Txapelketan adibidez, eta orduko hartan finalerdien atarian geratu ziren. Orain, esperientzia gehixeagorekin, koska bat igotzea izango dute helburu. Bigarren mailako txapelketan arituko dira aiestarantarrak, eta gaur hasiko dute ibilbidea Goikoetxea V-Goikoetxea VI bikote gogorraren kontra.
Erremontari berria du Hernanik: Julen Deskarga
Binakako Erremonte Txapelketak berritasun pozgarria dakar berekin. Julen Deskarga Murugarren hernaniarrak debuta egingo du bigarren mailan, Ibai Martirenarekin bikotea osatuta. 2005ean jaiotako aurrelaria CD Hernaniko pelotaria izan da orain arte, eta azaroaren 7ko jaialdian egingo du debuta modalitate berrian.