Gaur ospatuko dugu Kronikaren aldeko erremonte jaialdia. Galarreta bihurtuko dugu festaren erdigune, arratsaldeko 17:00etatik aurrera. 17:30etan hasiko da erremonte txapelketa, puntako jokalariekin.
Arazo teknikoak medio, giza proba bertan behera gelditu da, beraz, ate irekierarekin batera hasiko da sagardo dastaketa. Urtero lez, inguruetatik ekarriko dugun sagardoa izango da protagonista. Guztira 16 sagardotegietako dastaketa egiteko aukera izango dute herritarrek, eta tragoekin batera, pintxoak ere edukiko ditugu.
Musika ere ez da faltako jaialdian, eta honen ardura izango dute Eider eta Lierni Tolosa ahizpek. Galarreta girotzeko eta belarriak goxatzeko aukera bikaina izango da!
Bailarakoak protagonista
Arratsaldeko 17:30etan hasiko da lehia. Puntako lau bikotek hartuko dute aurten ere kantxa: Aiestaran VII eta Barrenetxea IV, Goikoetxea V.aren eta Apezetxearen aurka arituko dira, eta Azpirozek eta Aiestaran VI.ak, Gurrutxaga eta Zubiri izango dituzte aurrez aurre. Finala 20 tantora izango da, bi bikote garaileen artean.
Kronika babesteko eta laguntzeko aukera eta gogoa duen herritar oro gonbidatuta dago ostiral arratsaldeko plan honetara. Gainera, bertaratzen diren herritarrek zozketatzen ditugun 3 sari irabazteko aukera ere izango dute.
Sarrerak salgai, gaur arte
Jaialdirako sarrerak eskuratzeko aukera dago, oriamendi.eus webgunean zein Dobera-Kronikaren bulegoan.