Iritsi da bailarako arraunlari eta arraunzaleen egun haundienetako bat. Gaur jokatuko dute Kontxako Banderaren 130. edizioko lehenengo estropada, bertako arraunlarien presentzia nabarmenarekin.
Goizeko 11:00etan hasiko da emakumezkoen estropada, eta bertako traineruetan Urumea bailarako zazpi arraunlari arituko dira: June Balda astigartarra (Donostiarra); Amaiur Olaiz astigartarra eta Nora Urbe hernaniarra (Hibaika); Miren Garmendia eta Maider Perez (Hondarribia); Jone Pastor hernaniarra (Tolosaldea); eta Maren Etxabe hernaniarra (Arraun Lagunak).
Gizonezkoen txanda, berriz, eguerdiko 12:00etan izango da. Bertan ere arraunlari dexente izango dira Urumea bailarako herrietakoak; bederatzi, hain zuzen: Jokin Iraola eta Iñigo Merkader hernaniarrak (Getaria); Imanol Muñoz 'Txiribi' hernaniarra (San Juan); Ander Balda, Unai Loyarte eta Markel Zapiain astigartarrak, eta Iker Imaz, Jon Iruretagoiena eta Xabat Pastor hernaniarrak (Donostiarra).
Gaurko egunez herritar askoren plana izango da Donostiako giroaz gozatzea.