Ekimen berezia jarri dute martxan aurten, Hernanin bertan, Beterri-Buruntza eskualdeko lehen sektoreko laneratzea sustatu nahian: Nekazaritza Eskola. Proiektu horren garapenean, lankidetzan ari dira Beterri-Buruntza Mankomunitatea, Gipuzkoako Foru Aldundia eta HENASE (Hernaniko Nekazari eta Abeltzainen Sustapenerako Elkartea), Hernaniko Udalaren laguntzarekin (ekarpen ekonomikoa egin eta azpiegiturak jarri ditu) eta HAZIren partaidetzarekin.
Eskualdeko eragileekin batera, «laneratzea areagotzeko beharra» identifikatu zuten lehen sektorean, eta horri erantzun nahi diote Nekazaritza Eskolaren prestakuntzarekin. Izan ere, Beterri-Buruntzako 2024ko enplegu arloko diagnostikoak agerian utzi zuen «belaunaldi erreleboaren gabezia larria» dagoela lehen sektorean: «Elikagaiak ekoizten dituzten ekoizleen %93k ez dute bermatuta beren jardunaren jarraipena». Horregatik, diote «erantzun estrategikoa» dela Nekazaritza Eskola, behar horri aurre egiteko: «Batetik, lehen sektoreko lan-erreleboa sustatzeko, uzta biltzeko garaian lan karga haundia duten sektoreetan eskulan kualifikatua eskainiz, eta belaunaldi erreleboa bermatuz. Eta bestetik, gizarte-kohesioa eta inklusioa indartzeko, egoera zaurgarrian dauden pertsonentzako formakuntza eta lanerako bidea erraztuz, eta haien autonomia eta gizartean partehartzea sustatuz», nabarmendu dute.
Lankidetza instituzionala eta komunitarioa du oinarri egitasmoak, eta denera 95.422 euroko aurrekontua du Nekazaritza Eskolak 2025erako. Eskualde mailako ikuspegia duenez, Beterri-Buruntza Mankomunitatea bera ari da hura sustatzen eta dinamizatzen, eta HENASEren gidaritzari esker, areagotu egin da lehen sektoreko eragileen partehartzea, eta horrela, «sektorearen premiak kontuan hartuta» garatu dute prestakuntza.
Lau hilabeteko formakuntza, Hernaniko Burujabetzen Etxean eta Karabelekoren baratzetan
Nekazaritza Eskolako formakuntza prozesuak lau hilabeteko iraupena izango du, eta aurten bi talde formatuko dituzte. Aurrenekoak dagoeneko bukatzear du bere ibilbidea, eta bigarrenak ekainean ekin zion.
Teoria eta praktika uztartuko ditu formakuntzak, eta Hernanin bertan egingo dute zatirik haundiena: Hernaniko Burujabetzen Etxean eta Karabelekoren baratzetan jasoko dute prestakuntza aurreneko hiru hilabeteetan, HENASEko hezitzaileen zein HAZI fundazioaren eskutik. Gainera, HENASEko ekoizle profesionalek ere hartuko dute parte saio espezializatuen dinamizazioan.
Eta ondoren, hilabete bateko praktikaldia egingo dute ikasleek HENASEko etxaldeetan, «eskualdeko ekoizpen eremua lehenengo eskutik bizi eta ikasitakoa praktikan jartzeko».
Uztailean egin zuten Nekazaritza Eskolaren aurkezpena, eta bertan izan ziren erakunde sustatzaile eta laguntzaileetako ordezkariak. Patxi Ibargurenek, Hernaniko zinegotzi eta Beterri-Buruntza Mankomunitateko lehendakari den aldetik, nabarmendu zuen «gero eta garrantzi haundiagoa» duela eskualdeko sareak, eta bi helburu nagusi dituztela bertan proposatzen diren proiektu guztiek: «Batetik, pertsonen enplegagarritasuna lantzea, laneratzea lortzeko asmoz; eta bestetik, hori uztartzea lurraldeak dituen lan-beharrekin». Zentzu horretan, eragileen arteko sinergiak goraipatu zituen: «Mankomunitatearentzat erronka haundia da Nekazaritza Eskola sustatzea. Izan ere, enplegu sozialeko ekosistema osoa indartu nahi dugu, eta hori ezin du egin erakunde batek bakarrik».
