Ezin izan zuen garaipenarekin hasi Jai Alai Summer Season txapelketa, ostegunean, Endika Barrenetxea hernaniarrak: 15-8, 8-15 eta 1-8 galdu zuen Josetxo Ezkurrarekin batera, Segurolaren eta Larrañagaren kontra. Oriamendi torneoan, aldiz, aurreneko lau puntuak eskuratu zituen Aritz Zubiri goizuetarrak: 12-15, 15-11 eta 8-1 irabazi zuen Susperregirekin batera, Paulo Aiestaran hernaniarraren eta Martirenaren kontra.
Gaur izango dute bigarren jardunaldia bi txapelketek, Galarretan, 16:30etan hasiko den jaialdiarekin. Puntako hiru partidu jokatuko dituzte. Oriamendi torneokoa izango da aurrenekoa, eta Oier Apezetxea goizuetarrak jokatuko du, Gurrutxagarekin batera, Jabaleraren eta Eskuderoren kontra.
Beste biak, berriz, Summer Seasonekoak izango dira: Azpiroz-Ansa II eta Segurola-Larrañaga izango dira aurrez aurre jaialdiko bigarrenean; eta Barrenetxea IV-Ezkurra II eta Aldabe-Juanenea hirugarrenean. Estreinako garaipena lortu nahi du hernaniarrak, hasiera kaxkarrari buelta ematen hasteko.