Kitto, amaitu da Euskaraldia. Pasa den igandean amaitu zen ariketaren hirugarren edizioa, eta orain ondorioak ateratzeko garaia da. Datuei zuzenean erreparatzen badiegu, egoera oso bestelakoa da Hernanin eta Astigarragan. Hernanin 1.712 norbanakok eman dute izena Euskaraldian (1.492 Ahobizi/220 Belarriprest) eta Astigarragan 789 norbanakok hartu dute parte (682 Ahobizi/107 Belarriprest). Astigarragan datuek gorakada nabarmena izan dute aurreko urteekin alderatuta; Hernanin, berriz, beheranzko joera hartu du parte hartzeak.
Egoera honen aurrean, izen emateetatik haragoko balorazioa egin du Dobera Euskara Elkarteak: «Ekintza puntualetatik kanpo dauden egitasmoen balorazio zehatzak egitea ez da erraza izaten. Izen emate kopuruan edota banatutako txapa kopuruan zentratu gaitezke, baina horiek ere ez lukete aurtengo Euskaraldiaren arrakasta zuzen neurtuko».
Nabarmentzekoa izan da Euskaraldian zehar bailarako eragile askoren inplikazioa. Herri Batzordeen eta bileren bidez antolatu dituzte jarduera guztiak, eta horrek asko aberastu du prozesua: «Auzo elkarteak, ikastetxeak, herriko eragileak, pentsionistak... bakoitzak bere aletxoa jarri du eta izugarrizko laguntza izan da guretzat. Ez hori bakarrik, bakoitzak izan duen konpromezua eta inplikazioa ere goraipatu nahiko genituzke. Beraiei esker zabaldu dugu Euskaraldia».
Hamaikakoekin gustura
Bi herrietan oso gustura geratu dira osatutako hamaikakoekin. Horietan islatzen saiatu dira euskaldun eta euskaltzale perfil anitzak, eta antolatzaileek asko estimatu dute bakoitzak bere bizipenak kontatu izana.
Hortaz, alde on eta hobetzekoekin, «pozik» geratu dira Doberako kideak lortutako emaitzarekin: «Beti gehiago egin daitekeenaren sentsazioarekin gelditu bagara ere, pozik gaude aurtengo Euskaraldiak emandakoarekin. Herriko eragileekin izandako elkarlana eta harremana goraipatzekoa iruditzen zaigu eta hemendik aurrera ere, lanean jarraitzeko ilusioa mantentzeko indarra eman digu».
Euskaraldia amaituta, euskera sustatzeko lanean jarraitzea tokatzen da orain.
Eta orain zer?DOBERA EUSKARA ELKARTEA EUSKARALDIA Amaitu da Euskaraldia. Hamaika egunez soinean eraman ditugun txapak kendu eta egunerokotasunera bueltatuko gara. Ahobiziak eta Belarriprestak, ofizialki behintzat, desagertu egingo dira, eta berriz ere «herritar» bihurtuko gara. Batzuentzat lasaitasunaren unea izango da; beste batzuentzat, ordea, estres linguistikoaren itzuleraren oroigarri. Badira bigarren egunean txapa alde batera utzi zutenak; baina badira, baita ere, 11 egunen ondoren oraindik ere txaparen koloreari eta esanahiari eusten diotenak. Horiengatik Euskaraldiak merezi duela sinesten dut. Euskaraldiaren edizio honek, kamisetetan zuloak baino gehiago utzi dituela sinetsi nahi dugu. Hernanin, behintzat, horrela izan da. Izan ere, aurtengoan batzar ireki bat izan dugu berrikuntza gisa: elkarrekin antolatu, hausnartu eta sortu dugu Euskaraldia. Auzo elkarteek, pentsionistek, herriko eragileek, ikastetxeek... ekarpena egin dute. Eta eskerrak eman nahi dizkiegu guztiei. Gogotsu eta ilusioz aritu gara, eta konturatu gara Hernanin euskararen alde lan egiteko prest dagoen jende asko dagoela. Elkar ezagutzeko, auzolanean aritzeko eta euskara gure harremanetan txertatzeko aitzakia ezin hobea izan da Euskaraldia. Hamaika eguneko ariketa bat baino gehiago izan da: jarrerak eta inertziak astintzeko une bat, eta etorkizunerako lan-ildoak irudikatzeko aukera bat. Orain gure esku dago erabakitzea Euskaraldia noiz bukatzen den. Edo, zergatik ez, inoiz ez bukatzea. Soinean txaparik gabe ere, belarriprest eta ahobizi izaten jarraitzeko unea da. Eta Hernanin, gutxienez, horretarako bideak irekita daude. Eskerrik asko parte hartu duzuen guztioi. Eutsi dezagun elkarlanari, eutsi diezaiogun euskarari. |