Datorren asteartean, Gipuzkoako gazteei errenta aitorpenari buruzko online hitzaldia eskainiko du GAZ emanzipaziorako zerbitzuak, eta antolatzaileek gazteei gonbitea helarazi diete. Saio honetan, errenta aitorpenaren funtsezko alderdiak ezagutzeko aukera izango dute bailarako gazteek. Era berean, zalantzak argitu eta informazio argia eta erabilgarria eskuratzeko tartea ere izango dutela nabarmendu du GAZ emanzipaziorako zerbitzuak. Eta gainera, hitzaldia eskainiko duten adituei galderak zuzenean egiteko aukera ere egongo da, «prozesu honi buruzko edozein zalantza argitzeko asmoz».
Beraz, interesa duen orok ondorengo inkesta bete beharko du: //acortar.link/1UTZcJ
Hiru lurraldetan, hitzaldi bana
GAZek errenta aitorpenari buruzko hiru hitzaldi eskainiko ditu hiru lurraldeetan; lehenengoa Bizkaian, bigarrena Gipuzkoan eta hirugarrena, berriz, Araban. Hernaniko, Astigarragako edota Ereñotzuko gazteek GAZek eskainiko duen hitzaldian parte hartzeko asmoa badute, asteartean dute horretarako aukera, arratsaldeko 17:00etan.
Gazteentzat laguntza
GAZ emantzipazio-prozesua hasi nahi duten gazteei zuzendutako informazio, orientazio eta laguntza-zerbitzu pertsonalizatua da. Eta ondorengo helburua du: «etxetik atera nahi duzuen Euskadiko gazte guztiek informazio egokia eta nahikoa izatea zuen emantzipazio-ibilbidea erabaki ahal izan dezazuen. Modu honetara, bizitzarako eta garapen pertsonalerako proiektu autonomo bat hasi ahal izateko beharrezkoak diren tresnak izango dituzue».