Hainbat probatan aritu dira bailarako korrikalariak, joan den asteburuan. Mendi lasterketetan, Saran eta Arantzan izan dituzte hitzorduak, eta aurreneko postuetan sailkatu dira goizuetarrak. Hodei Lujanbio bigarren izan zen Sara Korrika Trailen, eta gertu izan zuen garaipena: 2:04:53 denboran osatu zuen 22 kilometroko ibilbidea, eta 50 segundu lehenago helmugaratu zen Pierre Comet irabazlea.
Arantzako Mendi Lasterketan (19,5 kilometro), berriz, Aitor Aizkorbe sailkatu zen aurreneko hamarren artean. Zazpigarren izan zen goizuetarra, 1:51:01 denborarekin. Emakumezkoen artean, laugarren izan zen Ainhoa Arruti urnietarra (2:16:46), lasterketa Mattin Sanzberro hernaniarrarekin batera osatuta.
Ania Arregi eta Maitane Guerrero 10 onenen artean, Azkoitia-Azpeitia maratoi erdian
Asfaltoko probei dagokienean, Azkoitia-Azpeitia maratoi erdia jokatu zen larunbatean, punta-puntako partehartzearekin. Emakumezkoetan, 10 onenen artean sailkatu ziren bi hernaniar: zortzigarren helmugaratu zen Ania Arregi, 21 kilometroak 1:29:34 denboran osatuta; eta 10garren izan zen Maitane Guerrero (1:29:45). Iokin Esnal hernaniarra (1:22:44) izan zen bailarako azkarrena gizonezkoetan.