Ezin hobeto ekin diote Gipuzkoako Kopari, Urumea bailarako bolariek. Aurreko asteburuan Fernando Gallegok irabazi bazuen Hernaniko tiraldia, oraingoan Mikel Arroio nagusitu da Idiazabalen, Joxe Mari Etxebesterekin berdinduta, 48na brilarekin. Haiek adina bota zituzten Iker Altzelaik eta Enrique Egañak ere, baina desenpatean aurretik izan ziren bailarako biak. Aner Miner, gainera, bosgarren izan zen, 47 brilarekin.
Gizonezkoen sailkapen nagusian ere, bailarako hiru daude lau onenen artean. Arroio bera dago lider, 94 brilarekin, Ibon Minerren (93) aurretik; eta laugarren dago Joxe Mari Etxebeste (92). Iozu Lazkano daukate tartean, 93 brilarekin. Aner Miner seigarrena da, 89rekin.
Emakumezkoen artean, berriz, hirugarren postura igo da Rosa Santos astigartarra, 64 brilarekin; baina urruti xamar dauzka aurreneko biak: Olatz Larrañaga (82) eta Garbiñe Alustiza (64). Santosek 36 brila bota zituen Idiazabalen, eta bosgarren izan zen eguneko sailkapenean. Zazpigarren izan zen Martxeli Kanflanka, 34 brila botata; baina bederatzigarren postuan dago oraindik, sailkapen nagusian.
Lasarten eta Gabirin, azkeneko bi tiraldiak
Beste bi tiraldi izango ditu Gipuzkoako Kopak, txapeldunak zein izango diren erabakitzeko. Datorren igandean izango da hurrengoa, Lasarte-Orian; eta apirilaren 13an azkenekoa, Gabirin. Bi horietan, toka tiraldia ere izango da, Gipuzkoako Txapelketarako puntuagarria.
Horien ondoren, hilabeteko etena izango dute bolariek, eta maiatzaren 11n bueltatuko dira, gazteen eta beteranoen ohiko jardunaldiarekin.