Espainiako Koparen etenaldia aprobetxatuz, etxetik gertuago aritu da Eneko Olveira, joan den asteburuan. Green Series txapelketako bigarren proban aritu zen igandean, Ispasterren; eta podiumera igo zen astigartarra, garaipenaren lehian izan ondoren. Hirugarren helmugaratu zen azkenean, 1:33:26 denborarekin; eta aurretik izan zituen Jose Miguel Ramirez de Arellano (1:32:26) eta Nathan Célié (1:33:11).
Gainera, Olveira izan zen onena 23 urtez azpikoen artean. Eta nabarmentzekoa da, era berean, astigartarrak berak egin zuela probako itzuli azkarrena: 15:05 denboran osatu zuen bere hirugarren itzulia.
Datorren asteburuan izango da Espainiako Koparen laugarren proba, Madrilgo Alpedrete herrian, eta bertan ariko da Olveira. Laugarren dago une honetan, elite mailako sailkapenean.
Unax Otegi 21garren, Deban
Errepidean, bestalde, bailarako zenbait txirrindulari aritu ziren larunbatean Deban, junior mailako Amaikak Bat proban. Unax Otegi hernaniarra izan zen bailarako onena, 21garren helmugaratuta. Erabat hautsi zen lasterketa, eta Eñaut Urkaregi irabazlea baino 1:28 beranduago iritsi zen Otegi. Aimar Capdequi astigartarra 42garren izan zen, 2:28ra.