Euskal Sagardoa Jatorri Deiturak eta ENEEK-Ekolurrak aurreko urte amaieran ekarlanean ekoiztutako euskal sagardo ekologikoa bereizteko euskarria aurkeztuko zuten ostegunean, Iparragirre sagardotegian. Txotx denboraldian eredu ekologikoan ekoiztutako Euskal Sagardoa eskainiko da hainbat sagardotegitan eta eskaintza ikusarazteko Euskal Sagardoak eta ENEEK- Ekolurrak elkarlan horren berri eman eta kupeletarako diseinatutako euskarria aurkeztuko zuten.
Unai Agirre Euskal Sagardoa Jatorri Deiturako koordinatzaileak adierazi zuenez, «kontsumitzaileak ikusi ahal izango du zein den Euskal Sagardoa eta era berean ekologikoa. Aurtengo sagar uztan, 335.000 litro Euskal Sagardo ekologiko ekoiztu dira, eta horretarako 495.000 kilo sagar bildu dira, europar araudiak ezarritako nekazal ekoizpen ekologikoaren irizpideak jarraituz. Hori kontuan izanda 2024a sagar ez urtea izan dela. 2025an gehiago ekoiztuko da».
ENEEK-Ekolurrak-eko Judit Gartziak Kontseiluaren ordezkari bezela esan zuenez: «nekazal ekoizpen ekologikoak goranzko bidean jarraitzen du eta aurreikusi liteke, datozen urteetan eredu ekologikoan ekoiztutako Euskal Sagardo gehiago izango direla merkatuan. Elikagai ekologikoen eskaera geroz eta haundiagoa da orokorrean eta berdin gertatzen da sagardo ekologikoaren kontsumoarekin. Hori horrela, geroz eta sagasti gehiago ziurtatzen dira eredu ekologikoan. Une honetan EAEn 340 Ha sagasti daude ekologikoan ziurtatuta».
Elkarlan honek erakusten omen du «garaira eta kalitatera egokitzeko sagar eta sagardo sektoreak duen interesa eta konpromisoa, eta apustu hori balioan jarri nahi izan da sagardotegietan».
Sagardo Ekologikoaren berezitasuna
Judit Gartziak aditzera eman zuenez «ekologikoaren oinarria fruta-arbolaren osasuna, lurzoruaren emankortasuna eta biodibertsitatea hobetu eta zaintzea da eta horretarako, prozesu osoan sintesiko produktu kimikoak erabiltzeari muzin egiten zaio, hasi sagastitik eta botilara arte. Ongarri naturalak erabiltzen dira eta gainera, uztaren berezko izaera eta zaporea mantentzea bilatzen da, prozesu natural honetan».
Iparragirreko Arantza Eguzkitzak aurkezpenean esan zuen Iparragirre 2009an hasi zela sagardo ekologikoa ekoizten: «Suposatu zuen sagastiak zaintzen hastea, askotan kontrakoa dela uste den arren. Guretzat bi kontzeptuak bata bestea gabe ez dira ulertzen. Ez dugu ulertzen sagardo bat bertako sagarrarekin egiten ez dena eta ingurugiroaren osasunari begira ez dago zalantzarik, erabakia ekologikoaren aldekoa dela. Lehenengoak izan ginen zigiluak uztartzen eta zigilua da beste ardatza. Kontsumitzaileari bermea ematen diogu».
Euskal Sagardo ekologikoaren identifikazioa
Euskal Sagardo ekologiko botilek Euskal Sagardoaren zintilo edo sagartxoa eta kaputxoia daramate, baita elikagai Ekologikoa dela jakinarazten duen euro-hostoa ere. Bi zigilu hauek elkartuta, kontsumitzaileek Euskal Sagardo ekologikoak bereizteko aukera izango dute sagardotegietan.
Euskal Sagardo ekologikoa ekoizten duten sagardotegiak dira: Txindurri Iturri, Ekain, Petritegi, Ola, Etxeberria, Gartziategi, Iparragirre, Iturrieta, Isastegi, Izeta, Oiharte eta Gurutzeta.
Isastegiko Joseba Lasak aurkezpenean aipatu zuenez, «Azkenetakoak izan gara sartzen, baina argi ikusten genuen euskal sagardoak eta ekologikoak eskutik joan behar zutela. Bezeroak ere hori espero du bai bertako bezeroak eta atzerrikoak esportatzen denean».
Bestalde, aipatutakoekin batera sagardo ekologikoa egiten duten sagardotegiak: Unanue, Lizagasar, Arratzain, Bereziartua, Astigarragako Ozpinak, Zapiain eta Zelaia. k