Bihar zortzi elkartuko dira Agin Laburu, Andoni Rekondo, Maialen Lujanbio, Unai Agirre eta Jexux Mari Irazu bertsolariak, Astigarragako Erribera kulturgunean. Kronikaren 25garren urteurreneko ospakizunak aurrera doaz, eta hori ardatz hartuta, apirilaren 4an punta-puntako saioa izango da, berezia eta indartsua, gertuko bertsolariekin. Gai-jartzaile lanetan, gainera, Aritz Zerain arituko da.
Hortaz, saioan hartuko dute parte Kronikaren aurreneko lantaldeko hiru kideek, Agirrek, Zerainek eta Irazuk; eta baita gaur egun Kronikan kazetari den Rekondok ere. Bertsotan jarriko dute dantzan Urumea bailarako egunerokotasuna, eta azaleratuko dituzte Kronikaren inguruko hamaika kontu, anekdota eta xelebrekeria.
Bertso saiorako sarrerak salgai daude Kronikaren bulegoan bertan (Larramendi 11 behea, Hernani) eta Astigarragako Ikatza tabernan, 10 euroan.
San Joan egunaren bezperan beteko ditu Kronikak 25 urte, eta urteurren borobila ospatzeko hainbat ekintza izango dira urte osoan zehar. Otsailaren 13an izan ziren aurrenekoak, Hernaniko Biteri kultur etxean: Kronikaren ibilbideari errepasoa egiteko mahai-ingurua eta erakusketa. Bertso jaialdia da hurrengoa zita, eta ez azkena izango.