Duela lau urte bezalaxe, EH Bildu izan zen alderdi bozkatuena Urumea bailaran, Eusko Legebiltzarrerako hauteskundeetan. Nagusitasun haundiagoa izan zuen oraingoan, gainera, bai Hernanin eta bai Astigarragan.
%60,34ko partehartzearekin, botoen %53,67 eskuratu zuen EH Bilduk Hernanin (5.035 boto guztira). EAJ-PNVk 2.202 boto eskuratu zituen (%23,47); eta PSE-EE izan zen hirugarren indarra, 1.027 botorekin (%10,95). Elkarrekin Podemosek 327 boto jaso zituen (%3,49), Sumarrek 308 boto (%3,28), eta PPk 290 boto (%3,09).
Partehartzea pixka bat haundiagoa izan zen Astigarragan, %61,03koa zehazki. EH Bilduk lortu zuen botoen %48,56 (guztira 1.657 boto). Eta Hernanin gertatu bezalaxe, EAJ-PNV (994 boto, %29,13) eta PSE-EE (300 boto, %8,79) izan ziren bigarren eta hirugarren indarra. Sumarrek 151 boto lortu zituenu (%4,43), PPk (134), Elkarrekin Podemosek (73) eta VOXek (49) baino gehiago.
Esan bezala, bi herrietan areagotu zuen bere nagusitasuna EH Bilduk. Hernanin botoen %49,05 eskuratu zuen 2020an, eta Astigarragan botoen %43,12.
27na legebiltzarkide, EAJ-PNVk eta EH Bilduk
Euskal Autonomia Erkidegoari dagokionez, %62,5eko partehartzearekin, oso parekatuta izan ziren EAJ-PNV eta EH Bildu; eta parekotasun hori islatuko da Eusko Legebiltzarraren osaketan: 27na legebiltzarkide lortu zituzten bi alderdiek. Botoen %99,74 zenbatuta, alderdi jeltzalea izan zen bozkatuena EAEn, botoen %35,22 eskuratuta. EH Bilduk botoen %32,51 lortu zuen.