Sergio Roman hernaniarra bigarren eta Lierni Zinkunegi astigartarra hirugarren izan ziren, igandean, Udaberriko Lasterketaren 21. edizioan, Donostiarrak kirol klubak eta Euskal Herriko Unibertsitateak antolatuta.
Hotzari aurre eginez baina eguraldi argia lagun, Ibaetako campusetik abiatu ziren 2.200 korrikalari, hiria korrika zeharkatzeko. Batzuek 5 kilometroko ibilbidea osatu zuten, eta beste batzuek 10 kilometrokoa, udaberriari ongietorria kirola eginez emateko.
Zinkunegi korrikalari astigartarrak, 39 minutu eta 15 segundu behar izan zituen 10 kilometroko ibilbidea osatzeko. Irati Zurutuza (37:29) eta Carmen Martin (38:53) donostiarrek amaitu zuten lehenengo eta bigarren, hurrenez hurren. Sergio Romanek 5 kilometrokoan hartu zuen parte, eta bigarren iritsi zen helmugara (15:24), Joseba Olaetxea tolosarraren (15:07) atzetik.
Mutiletan, baina 10 kilometrokoan, Javi Menta andoaindarrak irabazi zuen (31:00) eta bailarako lasterkarien artean Gaizka Izagirre izan zen azkarrena, 13garren, 32:43ko denborarekin.
Guztira Urumea bailarako 90 korrikalarik hartu zuten parte, gehienek lasterketa luzean.