Igandean bukatu zuten, Altzan, bolako Lehendakari Txapelketa. Eta oso torneo erregularrari bukaera polita emanda, txapeldunorde izan da Aner Miner ereñotzuarra. Ezin izan zuen Xabier Lazkanoren lidertza kolokan jarri; are gehiago, Lazkanok berak irabazi zuen Altzako tiraldia ere, 45 brilarekin, eta denera 183 brila pilatuta nagusitu da. Baina meritu haundiko bigarren postua lortu du Minerrek, 175 brilarekin, Altzan 40 bota ondoren.
Gizonezkoen sailkapen horretan, bosgarren bukatu du Joxe Mari Etxebeste astigartarrak, 171 brilarekin. Ibon Miner ereñotzuarra (170 brila), berriz, bigarren postutik zazpigarrenera erori da, txapelketa osoko bere tiraldi kaxkarrena Altzan eginda.
Emakumezkoetan, bestalde, Martxeli Kanflanka ereñotzuarra seigarren izan zen Altzan, 23 brilarekin; eta zazpigarren bukatu du sailkapen nagusian (83).
Datorren igandean hasiko da hurrengo txapelketa, Gipuzkoako Kopa; eta Hernanin egingo dute aurreneko tiraldia, Benta Berriko bolatokian.