Aurtengo udaberrian izango du laugarren edizioa Euskaraldiak, maiatzaren 15etik 25era; eta ekimenarekin bat egin dute Urumea bailarako udalerri guztiek.
Une honetan, entitateen izenemate epea dago zabalik, eta ziztu batean dijoa: dagoeneko 90 baino gehiago dira Euskaraldira batu direnak, bailaran. Egunero-egunero ari da entitateren bat izena ematen, dinamizatzaileek aditzera eman dutenez.
Norbanakoentzat, berriz, gaur zortzi zabalduko dute izenematea, martxoaren 15ean. Ahobizi gisa hartuko dute parte batzuek, belarriprest paperean ariko dira besteak... Eta berezitasun bat izango du aurtengoak, Astigarragan, Goizuetan eta Hernanin: Hika ere egingo du Euskaraldiak, hiru herrietan.
Aurreko ediziotan, zenbait herritan jarri zuten martxan 'Hikaldia' deitu zutena, eta ekimen horretatik abiatuta, Euskaraldia-Hika sortu dute Taupak eta ZirHikak, aurtengoan. Egitasmora batu dira 83 herri dagoeneko, eta horien artean daude Astigarraga, Goizueta eta Hernani. Hori horrela, Euskaraldian izena emango duten astigartarrei, goizuetarrei eta hernaniarrei, galdetuko diete Euskaraldia-Hikan ere parte hartu nahi duten. Baiezkoan, Euskaraldiko ohiko txapei (Ahobizi eta Belarriprest) pegatina bat gehituko diete, 'H' hizkiarekin. Honakoa izango da bere esanahia: 'Nahi baduzu, nirekin hika egin dezakezu'. Ezezkoa erabakiz gero, berriz, Euskaraldiaren ohiko dinamikan hartuko dute parte herritarrek, berdin-berdin.
Astebete barru zabalduko da Euskaraldirako izenematea, eta herritar guztiei luzatu diete parte hartzeko gonbitea, bailarako dinamizatzaileek.