Hasi da mendi lasterketen denboraldia, eta ekin diote lehiari, Urumea bailarako korrikalariek ere. Goiztiarrenek Beasaingo Garin auzoan izan zuten estreinakoa, urtarrilaren 19an. Bertan, 14garren sailkatu zen Aitor Aizkorbe goizuetarra (1:02:31), 13 kilometroko lasterketa explosiboan. Lau astigartar ere aritu ziren Garinen: Sergio De Oliveira 26garren (1:04:48), Xabier Bastarrarena 34garren (1:06:45), Asier Zabala 39garren (1:07:36) eta Joseba Bastarrarena 78garren (1:13:04). Egoitz Peñagarikano hernaniarrak ere osatu zuen proba, 1:21:53 denboran.
Hurrengo igandean ziren bailarako asko debuta egitekoak, Donostiako Herri Ametsa lasterketan; baina bertan behera geratu zen, eguraldiagatik.
Handik astebetera, Berastegiko Negu Trailen (16 kilometro) aritu ziren beste hainbat. Hiru goizuetar animatu ziren bertara: Hodei Lujanbio bederatzigarren izan zen (1:29:36), Aitor Aizkorbe 16garren (1:32:47), eta Egoitz Zubiri 103garren (1:53:20). Hernaniar asko izan ziren Negu Trailen egin zutenak estreinakoa, eta emakumezkoen artean 13garren sailkatu zen Maddi Ormazabal (2:10:03), eta 21garren Nerea Iraola (2:20:10). Gizonezkoetan, Emaitz Artola 44garren izan zen (1:41:54), Mikel Artola 68garren (1:47:16), Egoitz Peñagarikano 107garren (1:54:04), eta Oskar Gaskon 112garren (1:54:39). Julen Zuaznabar izan zen astigartar bakarra Berastegin, 164garren (2:06:04).
Eta joan den asteburuan, bi probatan izan ziren bailarako ordezkariak. Batetik, Zestoako Kobaz Koba Trailen aritu ziren zenbait. 15 kilometroko proban, esaterako, 16garren postua lortu zuen Pello Alberdi hernaniarrak, 1:27:18 denborarekin; eta 145garren helmugaratu zen Gorka Ronda astigartarra (1:53:25).
Eta bestetik, Uharteko Hiru Herri Trailen hartu zuten parte Mattin Sanzberro hernaniarrak eta Arantxi De la Fuente astigartarrak, 21 kilometroko proban. 83garren helmugaratu zen Sanzberro (2:34:51), ibilbidea Ainhoa Arruti urnietarrarekin batera osatuta. Emakumezkoetan zortzigarren izan zen Arruti. De la Fuente, berriz, 18garren izan zen emakumezkoen artean, 2:55:51 denborarekin.
Asteburu honetan izango dira mendi lasterketa gehiago. Besteak beste, Ordiziako Mendi Lasterketa (21, 14 eta 8 kilometroko probekin); eta Zarrakazteluko Larrate Trail (21, 14 eta 11 kilometroko probak).