Ezkurra II.ak eta Azpirozek 1-2 irabazi zieten Ansa II.ari eta Juaneneari Binakako txapelketaren jardunaldi berri batean. Emaitza honekin Ezkurra II.a eta Azpiroz hurrengo fasera sailkatuta daude eta gutxienez Binakakoaren finalerdiak jokatuko dituzte. Ansa II.a eta Juanenea, aldiz, ia kanporatuta daude, miraria behar baitute sailkatzeko. Segurolak eta Barrenetxeak falta zaizkien hiru partiduak edota Urrizak eta Larrañagak falta zaizkien bi partiduak galtzea behar dute, bakoitza puntu negatiboarekin.
Partidua hiru setetara joan zen, baina joko erabakiorrean urdinak gehiago izan ziren eta 5-8 irabazi zuten. Lehen seta ere erraz irabazi zuten urdinek, 7-15, baina gorriek ez zuten txapelketa utzi nahi eta 15-8ko partzial argiarekin berdindu zuten partidua.
Pena da Ansa II.ak eta Juaneneak berandu erreakzionatu izana txapelketan. Lehen itzuliak kalte egin die, laugarren eta bosgarren partiduak ondo jokatu baitituzte. Partiduak erritmoa izan zuen, abiaduraz jokatu zen eta ikuskizun ona eman zuten.
Lehen setean Azpiroz asko ateratzen eta Ezkurra tantoak bukatzen nabarmendu ziren. Bigarrenean kontrakoa gertatu zen. Juaneneak asmatu zuen sakearekin eta Ansak tanto politak egin zituen. Azkenean txanpona urdinen alde erori zen, jokoan berdindutako partida batean.
Aiestaran berriz ere bikain, Bigarren mailakoan
Bigarren mailako txapelketan Aldabek eta Aiestaranek erraz gainditu zituzten Gurrutxaga eta Martirena, 15-10 eta 15-5eko partzialekin. Aldabe bere maila erakusten ari da, baina Aiestaran hernaniarra da ikaragarrizko txapelketa egiten ari dena. Sakean eta peloteoan abiadura bizian astintzen du pelota.