Gabonetan erdira jaitsiko dira aurten kaleetako argiak. Horrez gain, udal langileak arduratuko dira argiak jarri eta kentzeaz. Erabakiaren helburua da dirua aurreztea, izan ere, Marian Beitialarrangoitia Alkatearen esanetan «diru asko xahutu da aurreko urteetan, batetik jartzeko eta kentzeko jendea behar izaten delako, eta bestetik, argindar asko kontsumitzen delako».
Azken urteetan Udalak piskanaka erosi egin ditu kaleetan jartzen diren argiak. Argiak jarri eta kentzeko lana enpresa batek egin du orain arte eta horrek 23.000 euroko gastua suposatzen zuen; horregatik, aurten ur eta argi zerbitzuko udal langileek jarriko dituzte eta diru hori aurreztuko du Udalak. Bestalde, argi indar kontsumoa ere jaitsi egingo da; iaz 1.000 euro gastatu ziren eta aurten erdira jaitsi nahi dute.
Santo Tomaseko asteburuan piztuko dituzte
Dagoeneko hasi dira udal langileak argiak jartzen. Astean ordu batzuk eskainiko dizkiote lan honi eta abenduaren 17ra arte luzatzea espero dute, gutxi gora behera. Asteburu horretan hain zuzen, Santo Tomas egunaren bueltan, emango diote krisketari eta herriko kaleak argi koloretsuez beteko dira.
Dendarientzat garrantzitsuak dira Gabonetako argiak. Alkatearen esanetan, «dendariek ere ulertu dituzte murrizketaren nondik norakoak» eta iritzia ere eskatu zitzaien. Azkenean argiak eskatu zituzten eta jarri, jarriko dira, beraientzat garrantzitsuak direlako».