Bailarako futbol talde nagusien artean, Hernaniko mutilena da etxeko zaleen aurrean ariko den bakarra, asteburu honetan. Ohorezko Erregionaleko berdeek Bergararen bisita jasoko dute gaur, arratsaldeko 17:30etan hasita, Zubipen. Partidu gogorra daukate hernaniarrek, ligako bigarren sailkatuaren kontra. Kontuak kontu, Añorgan oso maila onean aritzetik datoz berdeak, eta gaurkoan garaipena lortuz gero, bergararrak oso gertu izango lituzkete, bi puntura.
Euskal Ligako neskek ere ez daukate partidu erraza, Bizkaia aldean. Erandioko Betiko Neskak taldearen kontra ariko dira bihar, 18:00etan San Lorenzo zelaian. Sailkapenean sei puntu atzetik dira erandiotarrak, baina bolada onean dira, azkeneko bi partiduak irabazita. Hernaniarrek puntu bakarra pilatu dute azkeneko bi partidu horietan, baina ezin esan bolada txarrean direnik: puntu polita lortu zuten Mariño bigarrenaren kontra, aurreko asteburuan; eta seigarren postuan daude sailkapenean, 10 partidutan 18 puntu lortuta.
Kontrario zuzenaren zelaian Mundarro, lidertzara gerturatzeko
Etxetik kanpo ariko dira Mundarroko mutilak ere, Erregional Preferentean. Zizurkilen jokatuko dute gaur, arratsaldeko 18:00etan Elbarrenan, Danenaren kontra. Aurkari zuzena da talde zizurkildarra, sailkapenean postu bat atzerago dagoena. Behera baino, ordea, gora begira jarri nahiko dute astigartarrek. Izan ere, aurreko asteburuan Orioko bigarrena menderatu ondoren (3-1), gertu dauzkate aurreneko postuak: 14 punturekin bosgarren dago Mundarro, eta 17 dauzka Euskalduna liderrak. Gaurkoan garaipena lortzeak, lehenengoen pare jarri dezake talde astigartarra, oraindik partidurik galdu gabe dagoena: hiru garaipen eta bost berdinketa.