Giro aparta izan zuen, beste behin, Kronikaren aldeko erremonte jaialdiak. Urumea bailara osoko herritarrak bildu ziren atzo arratsaldean Galarreta frontoian, jaialdi konpletoarekin: herri kirol erakustaldia hasieran, erremonte txapelketa laburra ondoren, eta sagardoa eta pintxoak uneoro.
Ikuskizun politarekin eman zioten hasiera herri kirolariek: Epeleko Igoin Pikabea eta Loidiko Kimetz Oñederra aizkoran, eta Pagoagako Andoni Saizar harrijasotzen. Andoni Rekondo eta Eñaut Martikorena bertsolariek ere girotu zuten arratsaldea, festa frontoi barrura mugitu aurretik. Eta hortik aurrera, giro goxoa izan zen, erremonte partidu ikusgarriek eta jan-edanak lagunduta. Partiduen artean, Ttarla taldeko dantzari gazteek hartu zuten protagonismoa kantxan, bi emanaldirekin, eta bailarako sortzaileen produktu ederrak ikusi eta erosteko aukera ere izan zen harmailen atzealdean bertan.
Kronikak eskerrak eman nahi dizkie atzokoan Galarretara hurbildu ziren guztiei, parte hartu zuten herri kirolari, erremontista, bertsolari, dantzari eta sortzaileei, eta baita jaialdiari bere laguntza eta babesa eskaini dioten guztiei ere.