Futbol denboraldi oparoa izan da amaitu berri dena bailarako futbolarientzat. Ergobian bizi den Robin Le Normand defentsak Eurokopako titulua lortu du Espainiarekin, Luis Llopis atezainen entrenatzaileak Liga eta Champions League-a Real Madridekin irabazi eta gero. Le Normand, oraindik Realeko jokalaria dena, titularra izan da Luis de la Fuentek zuzentzen duen selekzioan, baita finalean ere.
Txapeldun izateko, 2-1 gailendu zen Espainia finalean Ingalaterrako selekzioaren aurka, Oyarzabal eibartarrak 88garren minutuan sartu zuen golari esker. Realeko lau jokalarik hartu zuten parte finalean (Le Normand, Zubimendi, Merino eta Oyarzabal) eta Le Normandek 82garren minutuan utzi behar izan zuen zelaia, giharretako lesio baten ondorioz.