Aurreko aste osoan zehar jokatu zen Donosti Cup nazioarteko futbol txapelketa, Urumea bailarako 18 talde tartean zirela. Hiruna partidu jokatu zituzten ligaxkan, eta bailarako zortzi talde sailkatu ziren txapeldunen fasera, euren multzoko bi onenen artean. Hortik aurrera, ordea, nabarmen zaildu zitzaien bidea, eta ez zuten azkeneko kanporaketetara iristerik izan.
Mutilen hiru taldek lortu zuten kanporaketa bat gainditzea, txapeldunen fasean: Hernani B taldeak, 19 urtez azpikoetan; Hernani A taldeak, 13 urtekoetan; eta Mundarro C taldeak, 10 urtez azpikoetan. Bigarren kanporaketan geratu ziren txapelketatik kanpo.
17 urtez azpiko neska hernaniarrak, kontsolazioko final laurdenetara
Kontsolazio fasea jokatu zuten bailarako beste hamar taldeek, beraien multzoko hirugarren edo laugarren izan ondoren. Fase horretan, nesken talde bakarrak egin zuen bide luzeena: 17 urtez azpiko hernaniarrek. Bi kanporaketa gainditu zituzten, eta final laurdenetara iritsi ziren. Etiopiako Greek Community School taldea menderatu zuten final hamaseirenetan (3-0), eta Paris 15 talde frantziarra final zortzirenetan (2-0). 1-0 galdu zuten final laurdenetako kanporaketa, Donostiaren kontra.
Bailarako beste lau taldek ere lortu zuten kanporaketa bat gainditzea, kontsolazio fase horretan; baina ezin izan zuten aurrera egin bigarrenean.
Lurralde osoko zelaietan aritu dira bailarako taldeak, eta Zarkumendegin eta Zubipen ere izan da futbol festa ederra, asteartetik larunbatera. Munduko hamaika txokotako talde eta jokalariak izan dira bertan.
DONOSTI CUP 2024 - BAILARAKO TALDEEN EMAITZAK
19 urtez azpiko mutilak
HERNANI A
Ligaxkan hirugarren, partidu bat irabazi eta bi galduta. Kontsolazio fasean, final zortzirenetara iritsi zen, Amara Berri 2-0 gaindituta. ASD Pro Ragusaren kontra galdu zuen (4-1).
HERNANI B
Ligaxkan lehenengo, bi partidu irabazi eta bat berdinduta. Txapeldunen fasean, final zortzirenetara iritsi zen, The English School penaltietan gaindituta. Galactic Soccerren kontra galdu zuen penaltietan, bana berdindu ondoren.
17 urtez azpiko neskak
HERNANI
Ligaxkan hirugarren, partidu bat irabazi eta bi galduta. Kontsolazio fasean final laurdenetara iritsi zen, Greek Community School (3-0) eta Paris 15 (2-0) gaindituta. Donostiaren kontra galdu zuen (1-0).
16 urteko mutilak
HERNANI
Ligaxkan bigarren, bi partidu irabazi eta bat galduta. Txapeldunen fasean, penaltietan galdu zuen aurreneko kanporaketa, Atletic Sant Justen kontra.
15 urteko mutilak
HERNANI
Ligaxkan hirugarren, partidu bat berdindu eta bi galduta. Kontsolazio fasean, penaltietan galdu zuen aurreneko kanporaketa, Antigua Luberriren kontra.
14 urteko mutilak
MUNDARRO
Ligaxkan laugarren, hiru partiduak galduta. Kontsolazio fasean, final hamaseirenetara iritsi zen, Lengokoak 0-7 gaindituta. Eglantinsen kontra galdu zuen, penaltietan.
13 urteko mutilak
MUNDARRO A
Ligaxkan bigarren, partidu bat irabazi eta bi berdinduta. Txapeldunen fasean, penaltietan galdu zuen aurreneko kanporaketa, Hondarribiaren kontra.
MUNDARRO B
Ligaxkan laugarren, hiru partiduak galduta. Kontsolazio fasean, final hamaseirenetara iritsi zen, Cristo Rey Oleiros 1-2 gaindituta. Ultimate Madriden kontra galdu zuen (20-0).
HERNANI A
Ligaxkan bigarren, bi partidu irabazi eta bat galduta. Txapeldunen fasean final hamaseirenetara iritsi zen, Danena 4-2 gaindituta. AR Javi Torresen kontra galdu zuen (6-1).
HERNANI B
Ligaxkan laugarren, hiru partiduak galduta. Kontsolazio fasean, 2-0 galdu zuen aurreneko kanporaketa, Vasconiaren kontra.
12 urteko mutilak
MUNDARRO A
Ligaxkan bigarren, partidu bat irabazi eta bi berdinduta. Txapeldunen fasean, 6-0 galdu zuen aurreneko kanporaketa, Futdiverren kontra.
MUNDARRO B
Ligaxkan laugarren, hiru partiduak galduta. Kontsolazio fasean, 5-0 galdu zuen aurreneko kanporaketa, Sevresen kontra.
HERNANI
Ligaxkan bigarren, bi partidu irabazi eta bat galduta. Txapeldunen fasean, 5-1 galdu zuen aurreneko kanporaketa, Inter Unionen kontra.
11 urteko mutilak
MUNDARRO A
Ligaxkan hirugarren, partidu bat irabazi eta bi galduta. Kontsolazio fasean, 5-7 galdu zuen aurreneko kanporaketa, Merignac Arlacen kontra.
MUNDARRO B
Ligaxkan laugarren, hiru partiduak galduta. Kontsolazio fasean, 4-2 galdu zuen aurreneko kanporaketa, Mary Warden kontra.
10 urtez azpiko mutilak
MUNDARRO A
Ligaxkan bigarren, partidu bat irabazi eta bi berdinduta. Txapeldunen fasean, 17-0 galdu zuen aurreneko kanporaketa, Donostiaren kontra.
MUNDARRO B
Ligaxkan hirugarren, partidu bat irabazi eta bi galduta. Kontsolazio fasean, final laurdenetara iritsi zen, San Ignacio 1-7 gaindituta. Sanseren kontra galdu zuen (6-0).
MUNDARRO C
Ligaxkan lehenengo, hiru partiduak irabazita. Txapeldunen fasean, final laurdenetara iritsi zen, Lengokoak 0-7 gaindituta. Antiguokoren kontra galdu zuen (2-8).