San Fermin egunez emango zaie amaiera Martindegi auzoko jaiei. Ostiralean hasi ziren auzotarrak festa giroan murgiltzen, eta hala jarraituko dute gaur arte. Goizean goiz esnatuko dute auzoa Astigarragako Txirriskla txistulari taldeak, dianarekin eta 12:30etan, euskal festari emango zaio hasiera; herri kirolekin eta bertsoekin. Aizkoran arituko dira Iker Vicente eta Aitor Saralegi, Hodei Ezpeleta 'Bihurri'ren eta Igoin Pikabearen aurka; harria jasotzen, berriz, Udane Ostolaza eta Aritz Aranguren 'Norde' arituko dira. Euskal festari jarraipena emateko, bertso saioa antolatu dute auzotarrek, eta bi saiotan bereizi dute; aurrenekoan kantatuko dute Amets Arzallusek eta Jesus Mari Irazuk; eta bigarren txandan Nerea Ibarzabalek jardungo du Arzallusekin eta Irazurekin. Bi saio hauen tartean, toka txapelketa jokatuko dute, eta txikiek puzgarrietan jolasteko tartea ere izango dute. Bertsoak amaituta, erromerian dantzan aritzeko aukera izango dute auzotarrek Izer eta Alabier trikitilarien eskutik, eta ondoren auzotarrek kalejira bat osatuz, Martindegiko San Fermin jaiei amaiera emango diote, festa giroan.
SAN FERMIÑAK 2024
GAUR Goizean goiz Diana Astigarragako Txirriskla txistularien eskutik 12:30 Euskal Festa 13:00 Bertsolarien saioa: Amets Arzallus eta Jexux Mari Irazu 17:30 Toka txapelketa nagusia 17:30 Puzgarriak 18:00 Bertsolarien bigarren saioa: Amets Arzallus, Jexux Mari Irazu eta Nerea Ibarzabal Jarraian Erromeria Izer eta Alabier trikitilariekin Ondoren Kalejira auzoan zehar festei amaiera emateko |