San Ferminak iritsi dira, gora zapi gorriak

Gaur bertan hasiko dira festak. Beraz prest dauzkate zapi gorriak auzotarrek, eta haurrak izango dira aurreneko protagonistak. Haiei eskainitako eguna izango da gaurkoa. Kalejirarekin hasi­ko dute eguna, eta auzoko hil­dakoen alde meza egin ondoren, haur jolasak eta buruhaundiak izango dira.
Arratsaldea, berriz, aurtengo berrikuntza batekin hasiko da, Andoni Magoaren Desorekatuak ikuskizunarekin. Ondoren karabina lehiaketa izango da, puzgarriak irekiko direlarik hortik orduerdira.

Tortilla eta sagardo dastaketa

Helduek, berriz, jan-edana izango dute aukeran: tortilla dastaketa egingo dute aurrena, eta saria ere jasoko du onenak. Tortilla goxoena Akelenea jatetxeak sarituko du. Ondoren, sagardoak hartuko du txanda, eta sagardotegi asko izango dira bertan, bere edari onenarekin: Zelaia, Oia­lu­me Zar, Oiarbide, Etxeberria, Larrarte, Gurutzeta, Petritegi, Larre Gain, Iretza, Artola, Elutxeta, Bereziartua, Mendizabal eta Indione. Pintxoak ere jarriko dituzte. Dastaketaren aurretik aizkolaritza saioa izango da, bi bikoteekin: Nerea Arruti-Malen Barrenetxea eta Irati Astondoa-Uxue Ansorregi. Afalostean, erromerian itxiko dute eguna, Bide Batez taldearen doinuei segita.

Bihar auzo bazkaria izango da

10:30etan hasiko dute mobida baserrietan zehar, trikitixaz lagunduta. Gero, oroigarri xume bat eskainiko diete galdu dituzten gertukoei, goiko aristian, eta eskertza egingo diote Tturko familiari, ematen dieten harreraren ordainetan. Auzo bazkaria egingo dute ondoren.

Bihar arratsaldean ere, ez dira aspertuko haurrak. Aurrena, bueltaxka eman nahi duten gaztetxoentzat zalditxoak izango dira. Eta ondoren, apar festak zurituko ditu haur zein gazteak.

Urtero bezala, bi zita berezi izango dituzte larunbat gauean: zaldi dema, Inaxio Zerain hernaniarraren eta Oiartzungo Aritz Garaiar 'Mixiyua'ren zaldien artean; eta platano dantza lehiaketa. Edozein estiloko kantuen erritmora, platanoari ezin eutsi ariko dira dantzan bikoteak, nork gehiago iraungo.

Eta haurrek bakarrik ez, helduek ere mugituko dute gorputza, arratsaldean. Dan­tzal­dia eskainiko du Itzal taldeak, 19:30etan, eta bigarren saio bat ere bai, gauerditik aurrera.

Jexux Mari Irazu, Nerea Ibarzabal eta Amets Arzallus, bertsotan

Lasaiago hartuko dute igandea, 12:30etako bermutarekin, eta herri kirolak izango dituzte ondoren: aizkoran, Iker Vicente eta Aitor Saralegi lehengusuak, Hodei Ezpeleta 'Bihurri' eta Igoin Pikabearen kontra; eta harria jasotzen, Aritz Aranguren 'Norde' eta Udane Ostolaza. Udanek, Aroa Sánchez ordezkatuko du Martindegin.

Bertsoak ere ederrak izango dira igandean, bi saio eskainiko baitituzte Jexux Mari Irazu eta Amets Arzallusek, goizean; eta arratsaldean Nerea Ibarzabal gehituko zaie.
Toka txapelketa nagusia eta puzgarriak bi bertso saioen artean izango dira Eta Izer eta Alaiber trikitilariekin dantzan aritu ondoren, kalejiran bukatuko dituzte jaiak.