Bost urteren ondoren, bueltan da Gipuzkoako Bertsolari Txapelketa. Atzo egin zuten aurkezpen prentsaurrekoa Donostiako Foru Aldundian, eta bertan azaldu zituzten aurtengo lehiaketaren nondik norakoak Asier Azpiroz Gipuzkoako Bertsozale Elkarteko lehendakariak eta Goizane Alvarez Kultura, Lankidetza, Gazteria eta Kiroletako diputatuak.
Irailaren 14an hasi eta abenduaren 14an amaituko da txapelketa, eta tarte horretan hamasei saio jokatuko dira Gipuzkoako herrietan. Final zortzirenetako lehenengo saioa Urretxun izango da, eta aurtengoan ere Illunbek hartuko du final haundia.
Bailarako herrietan ez da saiorik jokatuko, baina bertako bost bertsolarik hartuko dute parte txapelketan. Gipuzkoa Bertsotan fasetik sailkatu dira Eli Pagola, Andoni Mujika 'Anatx' eta Andoni Rekondo; final zortzirenetan hasiko da zuzenean Eñaut Martikorena; eta final laurdenak iritsi arte itxaron beharko du Agin Laburuk. Epaileei dagokienez, Bakarne Urreaga, Amaia Otxotorena eta Iñigo Legorburu arituko dira udazkeneko faseetan.
Guztira 48 bertsolarik abestuko dute txapelketan, eta final zortzirenak, final laurdenak eta finalerdiak jokatu ondoren, zortzi bertsolari iritsiko dira Illunbera.
Saio guztietako sarrerak salgai jarri dituzte dagoeneko www.bertsosarrerak.eus webgunean.
Saio guztien egutegia ikusteko aukera, hemen: https://labur.eus/qqwvz