Ez atzera ez aurrera geratu dira ibilgailuak, gehienak kamioiak, A-15 errepidean, Astigarraga eta Hernani parean. Nekazariek eta abeltzainek blokeoa eragin dute atzotik Biriatuko mugan, protesta gisa, traktoreekin bertaratuta; eta protesta bukatzearekin batera, ehunka kamioik hartu dute mugarako bidea. Horrek gehiegizko auto-pilaketa eragin du, eta une honetan 25 kilometro ingurukoa da sortu den auto ilara: Irundik hasi eta Andoainera arte daude ia geldirik.