San Isidro eguna da gaurkoa, baserritarren egun haundia. Eta Urumea bailaran, ohi bezala, ospakizunak izango dira hainbat txokotan. Hernanin, Kaxkoan izango da festa, goizean zehar. 11:00etako mezarekin hasiko dute eguna San Joan Bataiatzailean, eta Tilosetan izango dute ikuskizuna ondoren, 11:30etatik aurrera. Hasteko, pala partidua jokatuko dute Irazustabarrena-Galdos eta Macicior-Mendizabal bikoteek. Segidan, omenaldia egingo diote Arkaizpe baserriko familiari, eta bertsolarien saioa ere izango da. Ondoren, eskuz ariko dira beste bi bikote, Manterola-Lizeaga eta Apaolaza-Altuna. Eta bukatzeko, herri kirolen erakustaldia izango da.
Astigarragan, urteroko legez, bi tokitan izango da ospakizuna: Foru Plazan eta Zamalbide-Bentak auzoan. Estanga anai-arreben trikitixa doinuekin hasiko da festa Foru Plazan, 09:30etan; eta prozesioa eta meza egingo dituzte segidan (10:00). Hamaiketakorik ez da faltako Gure Izarra elkartean, 12:15etako idi demaren aurretik: Ipiñarrietak eta Aranbarrik aurrenekoz plazaratuko dute idi pare bana, 1.640 kiloko 'Atxitxe' harriarekin 30 minutuko lanean aritzeko. Eguerdiko 13:00etan jarriko dute mingaina dantzan Sebastian Lizaso eta Andoni Egaña bertsolariek. Eta festa borobiltzeko, herri bazkaria egingo dute, Elioneko baserriari omenaldi eta guzti.
Zamalbide-Bentak auzoan, berriz, eguerditik iluntzera luzatuko da ospakizuna. San Isidro zaindariaren ibilaldia egingo dute aurrena, 11:45etan hasita, Zamalbideko elizaren inguruan. Txistulariak ariko dira ondoren, eliz atarian, eta herri meza egingo dute 12:00etan. Meza bukatutakoan, 12:45etan botako dute jaiaren hasierako txupinazoa. Txistulariek girotuta, salda banatuko dute bertaratuen artean, eta bertsolariak ere ariko dira, Auzolan frontoiko lokalean: Emaitz Murua eta Eñaut Martikorena. Lagunarteko bazkaria ere egingo dute, Auzolan Elkartean, 14:00etan. Eta idi probarekin amaituko dute eguna, 18:00etatik aurrera: hiru idi pare ariko dira 2.000 kiloko harriarekin, Perurenako probalekuan. Doakoa izango da sarrera.