San Isidro eguna ospatuko dute etzi baserritarrek, Hernanin eta Astigarragan

Baserritarren eguna izango da asteazkenean, eta hori ospatzeko, urteroko ohiturei eutsiz, jarduera mordoa izango dira Astigarragan eta Hernanin. Astigartarrek goizetik eguerdira arteko egitarau oparoa prestatu dute. 09:30etatik aurrera, Estanga trikitilariak ariko dira herria trikitixa doinuez alaitzen, eta prozesioa eta meza izango dira segidan, 10:00etan. Meza amaituta, hamaiketako eder batez gozatzeko aukera izango dute astigartarrek, Gure Izarra elkartean. 12:15etan, Foru Plazan hasiko dira idi demak, oraingo honetan Ipiñarrieta eta Aranbarri idi-jabeen plazaratu gabeko idi pareak izango dira ikusgai, 1.64 kiloko harriarekin. Bertsotan ariko dira Sebastian Lizaso eta Andoni Egaña egun osoan zehar, eta eguerdiko 14:30etan, bazkari baten buletan bilduko dira denak, Elione 'Baserri bizia'ri  «merezitako esker ona emateko». 

Hernanin ere izango dira San Isidro eguna ospatzeko zenbait ekintza. Aurrena, urtero lez, San Joan Bataiatzailean meza eskainiko da, eta amaitu ostean, emakumezkoen goi mailako pala partidua jokatuko dute Irazustabarrenak eta Galdosek, Maciciorren eta Mendizabalen aurka. Ondoren, Arkaizpe baserria omenduko dute Tilosetan, eta euria eginez gero, udaletxeko arkupeetara lekualdatuko dute omenaldia. Bertsolariak girotuko dute eguna, eta gizonezkoen goi mailako eskuz binakako partidua ere jokatuko dute Manterolak eta Lizeagak, Apaolaza eta Altuna aurrez aurre izanik. Bukatzeko, herri kirolen erakustaldi ederrak emango dio amaiera San Isidro egunari.

San Isidro egunarekin Lurraldiari hasiera, Astigarragan

Hirugarren edizioa da aurtengoa eta etziko San Isidro egunez hasiko da Lurraldiaren egitarau potoloa. Igandera arte izango dira gozamenerako ekintzak, Astigarragako Udalaren, Goldeak eta Baratze Elkarteen eskutik.