Bihar goizean jokatuko da, Arabako Kanpezu herrian, mendi lasterketen Euskadiko Txapelketa. Kanpezu-Ioar probaren baitan izango da jokoan txapelketa, eta 26,5 kilometroko ibilbidea osatuko dute partehartzaileek, goizeko 09:00etan abiatuta.
Horrez gain, lasterketa laburrago bat ere izango da, 13,5 kilometroko ibilbidearekin.
Denboraldi osoan maila paregabea erakutsita, Kanpezun ariko dira Urumea bailarako hainbat korrikalari. Agerre taldeak, esaterako, jakinarazi du bertan izango direla Xabat Pagola ereñotzuarra, eta Anartz Artola, Jon Ander Olazabal, Ander Amonarriz, Jon Murua, Xabat Alonso, Aitor Urruzola eta Gorka Lopez de Arregi hernaniarrak. Taldeko beste zenbait kide ere izango dira, Ainhoa Arruti urnietarra tartean.
Bailaratik gertuago, Gipuzkoan izango da beste lasterketa bat gaur: Segura-Zerain Mendi Lasterketa, 15:30etan hasita, 24 eta 15 kilometroko bi ibilbiderekin.