Gaur arratsaldean jokatuko dituzte Hernaniko eta Astigarragako pelotariek Herriarteko Txapelketako final hamaseirenetako itzuliko partiduak. Arratsaldeko 19:30etan hasiko da jaialdia, eta hernaniarrak abantaila haundiarekin arituko dira gaurko hiru norgehiagoketan. Izan ere, emaitza paregabea eskuratu zuten joaneko jardunaldian; jokatutako hiru partiduak irabazi zituzten Txomiñenen, eta Astigarragako pelotarientzat oso zaila izango da kanporaketa iraultzea.
Ondorengoak izango dira gaurko partiduak: kadeteetan Amets Makatzaga eta Manex Alberdi (Hernani) Enaitz Isastiren eta Oier Galarragaren (Astigarraga) aurka arituko dira; jubeniletan Xuban Iturbek eta Oier Azpeitiak osatuko dute Hernaniko bikotea, eta Aimar Zabalak eta Xuban Goñik Astigarragakoa; eta nagusien mailan Xabier Salaberriak eta Josu Altunak (Hernani) Aimar Mujikaren eta Oier Gurutzealderen (Astigarraga) kontra jokatuko dute.
Giro ederra espero da Hernaniko frontoian.