Urrezko Banakako Aizkolarien Txapelketa gaur hasiko da Zumaiako Odieta frontoian, 18:00etatik aurrera, eta bertan Suharri Rodriguez Paolla ereñotzuarrak egingo du debuta. Beste zazpi aizkolarirekin batera arituko da eta kanporaketa pasako dute bi aizkolarik. Maila altuko kanporaketa espero da eta sailkatzeko faborito dira Joxean Etxeberria eta Suharri.
Aurreko urtean aizkolari ereñotzuarra finalerdietara sailkatu zen eta aurten emaitza berdintzen baldin badu maila haundiaren seinale izango da. Aurretik lehenengo kanporaketa hau gainditu beharko du. Lanak motzak izango dira eta edozein akats garesti ordainduko da. Ez da hernaniar bakarra izango Zumaiako jaialdian.
Malen Barrenetxea emakumezkoen Ligan, Nerea Arrutirekin arituko da
Jaialdi berdinean Binakako Aizkolarien Txapelketaren lehenengo jardunaldia jokatuko dute neskek eta bertan, Malen Barrenetxea hernaniarra arituko da. Nerea Arruti txapeldun urnietarrarekin batera osatuko du bikotea eta gaurko aurkariak, Irati Astondoa eta Maika Ariztegi beteranoak izango dituzte. Lehia estua espero da eskarmentu haundia duen bikote baten aurka.