300 haur errefuxiatu saharar hartu nahi ditu Oporrak Bakean programak, uda honetan, Euskal Herrian. Eta horretarako, beste horrenbeste harrera familia behar ditu. Otsailean zabaldu zuten deialdia, eta apirilaren 15ean bukatuko da familiek izena emateko epea. Kanpaina bukatzear dela, kezkatuta agertu dira programaren arduradunak: «Kanpaina bukatzeko egun gutxi falta diren honetan, helburua betetzeko harrera familia asko falta zaizkigu», ohartarazi dute.
Hori horrela, Euskal Herriko familiei luzatu diete deia, programarekin bat egin eta harrera familia gisa izena emateko. Zenbait bide dauzkate horretarako: oporrakbakean.eus webgunearen bitartez apuntatu, oporrakbakean@gmail.com helbide elektronikora idatzi, edo 696 014 786 telefonora deitu.
Hernanin, Udalaren bitartez egin daiteke izenematea zuzenean, apirilaren 15era bitartean: 943 33 70 17 telefonora deituta, lankidetza@hernani.eus helbidera idatzita, eta Kulturarteko Plaza Feministara bertaratuta. Gainera, hernaniarren kasuan, Udalak hartzen ditu bere gain bidaiaren gastuak, eta udaleku irekietako zerbitzua doan eskaintzen die goizero, bi hilabete horietan zehar.
38garren edizioa du Oporrak Bakean programak, eta urtero ematen diete aukera, 8 eta 12 urte bitarteko haurrei, «Saharako gatazka politikoa ahaztu, osasuna indartu eta beste errealitateak ezagutzeko». Bi hilabetez egoten dira Euskal Herrian, bertako familietan aterpe hartuta; eta egonaldi horrek mesede egiten die.
Pandemiaren aurreko kopuruetara itzultzeko nahia
Aurrerapauso bat eman nahi izan du Oporrak Bakean programak aurten, eta «harrera familia kopuruak dexente gora egitea», pandemiaren aurreko kopuruetara iristeko, Saharako errefuxiatuen kanpamenduko 300 haurri harrera emanez. Izan ere, pandemian eten egin zen programa, eta horren ondoren, 153 haur ekarri zituzten 2022an, eta 183 haur 2023an.