Bihar bilduko dira, hileko azken astearteroko deialdian, Astigarragako eta Hernaniko Udaletako Plenoak. Ohi bezala, Hernanikoa izango da aurrenekoa, arratsaldeko 18:00etan hasita; eta Astigarragakoa ondoren, 19:00etan.
Batean zein bestean, gai-zerrenda luzeak dauzkate lantzeko. 11 puntukoa izango da zerrenda Hernanin, eta gai garrantzitsuak daude tartean. Esate baterako, bertan emango dute Hernaniko Udalaren zein Ereñotzuko Auzo Udalaren 2023ko aurrekontuen likidazioaren berri, eta baita likidazioaren ondoren 2024ko aurrekontuetan egingo duten kreditu txertaketaren berri ere, bi kasuetan. Gainera, FL.08 eremuko hitzarmen urbanistikoa onartzea bozkatuko dute, aurkeztu diren alegazioei erantzun ondoren. Eta hiru mozio ere izango dira aztergai Plenoan. Bata, hainbat herritarrek aurkeztutakoa, eskatuz Arabako Foru Aldundiak berriro ekin diezaion Lurmen enpresak erregistratuta zeuzkan 61 kaxa garbitzeko lanari. Eta beste biak, Elkarrekin Podemosenak: Hernanin hondakinak biltzeko sistemari buruzko gogobetetze inkesta berri bat egitea eskatuz; eta proposatuz Hernaniko Udala izatea Viopeten parte, indarkeria matxistaren biktimei etxeko animaliekin laguntzeko programa.
Astigarragako Udalaren kasuan, are gehiago izango dira aztergaiak, 16 guztira; baina horietatik hainbat dagozkie kreditu aldaketei, eta Astigarraga Lantzenen eta Sagardun Partzuergoaren 2023ko likidazioari. ADIFi lursailak doan lagatzeko espedienteaz ere ariko dira, eta lankidetza hitzarmena sinatzea bozkatuko dute, Euskal Autonomia Erkidegoko Administrazio Orokorrarekin, Gipuzkoako Foru Aldundiarekin eta ADIFekin, Astigarragako tren geltoki berriko pasabidearen obrak finantzatzeko. Astigarragako herri baratzeen emakidaren proiektua onartzea ere bozkatuko dute, eta baita Asociación Internacional de Ciudades Educadoras erakundetik ateratzea ere.