Sekulakoa izan zen Korrikak Urumea bailaran piztutako festa, astearte arratsalde-iluntzean, Goizuetatik barrena sartu eta Arano, Ereñotzu eta Hernani ere dantzan jarri zituenean. Eta festa horrek segida izan zuen atzokoan, Korrikaren azkenaurreko egunean: Hernani eta Astigarraga zeharkatu zituen arratsaldean, eta asteartean bezalaxe, sekulako jendetza batu zen Korrikara, bi herrietan.
Urnietatik iritsi zen Korrika Hernanira, eta berehala egin zuten bat dozenaka herritarrek, tropel mardularekin. Plazara iritsi zenerako, izugarri luzea zen korrikalari ilara, eta hala osatu zuen ibilbidea Hernanin barrena: Kaxkoan gora-behera aurrena, Lizeaga auzoan ondoren, eta Latsunbeberrira, Antziolara eta Floridara azkenik, Zinkoeneara itzuli eta Astigarragarako bidea hartu aurretik.
Beste horrenbeste gertatu zen astigartarren artean ere, aurrenekoz jaso baitzuten 23garren Korrikaren bisita, atzokoan. Martindegi paretik pasa orduko hasi ziren astigartarrak Korrikarekin bat egiten, Mundarrok lekukoa hartzearekin batera. Hortik aurrera, sekulako jendetza izan zen Korrikaren tropelean, eta baita errepidearen alde banatan ere, erdigunean bereziki.
Astigarragan barrena buelta egin, eta Martutenerako bidea hartu zuen Korrikak, Donostiara iristeko. Gipuzkoatik Lapurdirako bidea hartuko du Korrikak gaur, eta Baionan bukatuko da eguerdian. Orduan emango dute argitara, ekitaldi nagusian, lekukoak aurtengoan 11 egunez gorde duen mezua.