Maila paregabean jarraitzen dute bailarako mendi korrikalariek, denboraldi hasiera honetan; eta oso emaitza nabarmenak lortu zituzten aurreko asteburuan. Anartz Artola hernaniarrak, esaterako, podiumera igotzea lortu zuen Kanariar Irletan, Transgrancanaria mendi lasterketa ezaguneko 21 kilometroko proban. Ederra egin zuen Artolak, proba 1:55:57 denboran osatuta, Antonio Martínezen (1:52:01) eta Yoel De Pazen (1:54:23) atzetik.
Etxetik gertuago, Lezo-Jaizkibel mendi lasterketa jokatu zen aurreko igandean, 14 kilometrokoa. Eta horretan ere, protagonista izan ziren bailarakoak. Podiumean izan zen Hodei Lujanbio goizuetarra, bigarren sailkatuta (1:08:37). Ander Iñarra lezoarrak (1:06:06) bakarrik hartu zion aurrea. Aurreneko postuetan izan zen Aitor Urruzola hernaniarra ere (1:11:10), bosgarren; eta Aitor Aizkorbe goizuetarra 23garren helmugaratu zen (1:18:02). Emakumezkoetan, zortzigarren izan zen Agerre taldeko Ainhoa Arruti urnietarra. Beste hiru hernaniar eta hiru astigartar ere izan ziren bertan: Mattin Sanzberro (1:35:09), Sergio Alvarez (1:35:19), Jose Manuel Benito (1:40:05), Iñigo Uranga (1:40:34), Kepa Pikabea (1:56:40), Tomax Elorza (1:56:40) eta Asier Izquierdo (2:04:56).