Donostiara traktore martxa egin zuten Gipuzkoako nekazariek, protesta gisa, otsailaren 12an; eta bigarrenez egingo dute gaur goizean. Oraingoan, ENBA eta EHNE sindikatuek egin dute deialdia, Gipuzkoako Baso Elkartearekin (GEBE) batera. Hiru zutabetan abiatuko dira goizeko 08:30ak eta 09:00ak bitartean, hiriburura iristeko: Legorretatik, Oriotik eta Errenteriatik. Astigarragatik ere aterako da talde, eta Urbil merkatal gunean egingo du bat Oriotik datorrenarekin, 09:45etan. Legorretako zutabea, berriz, Hernani paretik pasako da, A-15 errepidetik, 10:00ak aldera Andoainera iritsi ondoren.
Hiru zutabeek Donostiako Urbieta kalean egingo dute bat, eta bertatik Miramonera bidea hartuko dute, protesta Gipuzkoako Batzar Nagusietan bukatzeko. Eguerdiko 12:30etarako aurreikusi dute bertara iristea, eta komunikatua irakurri ondoren, entregatuko diete Xabier Ezeizabarrena Batzar Nagusietako presidenteari eta talde parlamentarioetako bozeramaileei.