Martxoaren 8a Emakume Langilearen Nazioarteko Eguna da eta dagoeneko antolatu dira hainbat erreibindikazio ekitaldi Urumea bailaran. Ereñotzun, esaterako, egitarau berezia prestatu dute aurten, Olak Auzo Elkarteak eta Katiluzar Guraso Elkarteak. Arratsaldean hasiko dituzte ekitaldiak.
15:45etan, eskolako patioan, erritmo eta dantza afrikar modernoen bidez aldakak mugituko dituzte, «gure lekua hartzeko». 18:30etan, auzoan bertan elkartuko dira Hernaniko manifestaziora joateko; eta ondoren, auzora itzuliko dira afaltzeko eta poesia emanaldiaz gozatzeko.
20:30etan hasiko da afaria Ur Mia elkartean, eta bertan afaltzeko sarrerak salgai daude, 15 euroan, Irrintzi tabernan, Ereñotzuko dendan, Auzo Udalean edo 627 669 753 telefono zenbakian. Erosteko azken eguna biharkoa da. Afariko menua honakoa izango da: sarrerakoak, paella, sagar tarta eta kafea. Eta afaldu ondoren, Mejillon Tigre Punk poesia emanaldia izango da. Sarrera irekia da horretarako.
Martxoaren 10ean, azkenik, helduentzako 80 amandre izeneko ipuin kontaketa izango da, Dorleta Kortazarren eskutik, 19:00etan hasita Ludotekan.
Goiz Eguzkin bi jarduera antolatu dituzte
Hernaniko Goiz Eguzki jubilatuen egoitzan, bestalde, martxoaren 8rako bi ekitaldi antolatu dituzte. Alde batetik, azken urteetan bezala, 80 lagunentzako babarrun jatea izango da. Postrea eta kafea ez dira faltako. 11,5 euroren truke izena eman behar da eta lehenengo 80ek izango dute lekua. Ondoren, arratsaldeko 17:30etan, Goiz Eguzki Abesbatzako emakumeek kontzertua eskainiko dute, areto nagusian.
Egun horretarako, bailaran osoan antolatuko dira mobilizazioak, eta eguna hurbildu ahala argitaratzen joango dira.