Inauterietako balantzea egiteko Kontun Eguna ospatu zuten larunbatean goizuetarrek, eta ederki gainera. Eguerdiko 12:30ak aldera, Igandea txarangak kaleak girotu zituen, poteoak iraun bitartean. Bazkari eder baten bueltan bildu ziren ondoren, eta karnabalen inguruan jardun zuten kontu kontari. Arratsaldean berriro kalejirak girotu zituen Goizuetako kaleak eta gauean, Goizuetako gaztetxean amaitu zen festa.
Goizuetarrek ez ezik, astigartarrek ere asteburuan agurtu zituzten inauteriak, Kaldereroen konpartsarekin. Ergobiako plazatik abiatu ziren, eta kalejiran joan ziren saltoka, zartagiak astinduz, Joseba Barandiaran plazara. Ondoren, afari batekin borobildu zuten eguna, Zipotzan.
