Euskal Herri mailako txapelketei eman diete hasiera bailarako palistek, joan den asteburuan, emaitza gazi-gozoekin. Txapelketa nagusian, Elitekoan, porrota jaso zuen Amaia Irazustabarrena hernaniarrak, Gasteizen. Ruiz de Azuarekin bikotea osatuta, 20-30 galdu zuen Irazustabarrenak, Murilloren eta Ardanazen kontra. Txapelketa berean, eta Gasteizen bertan, garaipena lortu zuen CD Hernaniko Leire Galdos oiartzuarrak, Igoarekin batera, Martinen eta Saezen kontra (30-28).
EH Irekian, berriz, bikain hasi dute ligaxka Enara Macicior eta Ane Kerejeta hernaniarrek, lehenengo mailan: 30-17 nagusitu ziren larunbatean, Lekunberrin, Larraungo Berekoetxearen eta Eguzkizaren kontra. Maila berean, garaipena lortu zuen CD Hernaniko Garazi Eizmendi aiarrak ere, Errekako Salanuevarekin, Oberenako Espinalen eta Sarasibarren kontra (30-22).
Hirugarren mailan, ordea, galdu egin zuen Irati Olveira astigartarrak, Mirandarekin batera, Behar Zanako Aldazabal ahizpen kontra (16-30).