Urteurren borobila beteko du aurten Doberak antolatutako 'Bota Bertsoa!' lehiaketak. Hamargarren edizioa izango da 2024koa, eta sekula baino sagardotegi gehiagotan parte hartu ahalko da.
Hernaniko, Astigarragako, Ereñotzuko eta Urnietako 23 sagardotegitan jarriko dituzte postontziak, sagardotegietako bertsolari abilenek sortutako ale fiñenak gordetzeko. Aurtengo edizioko gaia 'Gaur gaurkoak, bihar biharkoak' da; hortaz, gai horrekin lotutako bertsoa osatu beharko dute parte hartzaileek, bakoitzak nahi duen doinuan eta neurrian, eta izen abizenak eta telefono zenbakia zehaztuta.
Sagardotegietako postontzietan utzitako papertxoez gain, beste bide batzuetatik ere bertsoak bidaltzeko aukera izango da. Iazko modura, emailez dobera@dober.eus helbidera idatzi daiteke, eta, berritasun gisa, @doberaelk instagram kontuan ere jasoko dituzte bertsoak, bideoz, argazkiz zein idatziz.
Apirilean egingo dute sari banaketa
Denboraldi guztia izango dute bertsolariek euren lanak prestatu eta entregatzeko. Sari banaketa apirilaren 26an izango da, ostiral arratsaldean. Doberako kideek zehaztu dute urteurren borobila ospatzeko ekitaldi berezia prestatuko dutela: «Emanaldi berezia antolatu dugu eta sorpresa mordoa izango dira. Urtero bezala, sari mordoa izango da: bi lagunentzako otorduak, sagardo kaxak, ekitaldietarako sarrerak...».
Iazko langa gainditzea helburu
Arrakastatsua izan zen aurreko urteko edizioa; 100 bertsotik gora jasota. Hala ere, langa hori gainditzea da aurtengo helburuetako bat.
|
X. BOTA BERTSOA LEHIAKETAKO HERNANI ALTZUETA, AKARREGI, ELORRABI. IPARRAGIRRE, ITXAS-BURU, OLAIZOLA, OTSUA-ENEA, RUFINO ETA ZELAIA EREÑOTZU ASTIGARRAGA URNIETA |