Hernanialdeko Zilegi Eskolak antolatuta, hiru ikastaro egiteko aukera izango da urtarrilean zehar, Hernanin eta Astigarragan.
Hilaren 15ean, datorren astelehenean, Sormen tailerra eskainiko du Uxue Bereizartua 'Berexiart' sortzaile hernaniarrak. Goizeko 09:30etan hasiko da saioa, eta «nork bere sorkuntzari bidea» emateaz gain, «pinturarekin esperimentatzeko aukera ere izango da».
Urtarrilaren 19an eta 26an, berriz, Noka ikastaroa eskainiko du Gatx Eizagirre filologoak, Erribera kulturgunean. Bi saioak arratsaldeko 18:00etan izango dira, eta hizkerari buruzko zenbait gako emango ditu bertan.
Azkenik, Hernanin eta Astigarragan eskainiko du 'Etxea: antolaketa eta ordena' saioa Maitane Ormazabal Larzabal antolatzaile profesionalak. Bertan, etxeko espazioei probetxua ateratzeko aholkuak eta etxea ordenatuta izateko trikimailuak azalduko ditu.
Astigarragako Kultur Etxe zaharrean urtarrilaren 23an (18:00) eta urtarrilaren 25ean (09:30) arituko da; Biterin, aldiz, urtarrilaren 16an (18:00) eta urtarrilaren 22an (09:30).
Edonork eman dezake izena
Zilegi Eskolatik jakinarazi dute herritar guztiek parte hartu dezaketela prestatutako saioetan: «Interesa duen edonork izena emateko modukoak dira eta elkarrekin euskeraz aritzeko saio dinamikoak izango dira», nabarmendu dute.
Horretarako, zilegieskola@aek.eus helbidera idatzi edo 663 04 33 14 telefonora deitu behar da.