Urtero bezalaxe, berezia bezain magikoa izan da aurtengo abenduaren 24a. Urumea bailara osoko herritarrak kalera atera ziren Olentzerori eta Mari Domingiri ongi etorria ematera, eta etxeko txikiek emozioz pasa zuten igandea, haien esperoan.
Olentzerori eta Mari Domingiri harrera egin aurretik, kalejira herrikoian murgilduta, dantzan eta saltoka pasa zuten goiza hernaniarrek. Astigartarrek, goizuetarrek eta aranoarrek ere musikaz eta dantzaz gozatzeko aukera izan zuten haien herrietan osatutako kale bueltekin.